Kaş ki bir gün yaza biləydim öz həqiqi tarixçəmi

Əgər cürət edib yazsaydım öz həqiqi tarixçəmi,

mənim tarixçəmi yazan mələkmi olacaqdım?

İstəklərimin gürdabında mən təkəm,

tənhayam, onlarsa ikidir,

üstəgəl, tükənir bizim qələmlərin mürəkkəbi.

Kaş ki səbrim tükənməyəydi...

o kitabın sağ səhifəsində bir boş yer qalaydı...

Qərarsızlığım, tərəddüdüm, ümüdüm

uşaq ləpirləritək orda iz buraxaydı...

Və bir gün o Nur həmin yazıya işıq salaydı,

"o bağışlandı" anlaşılaydı, oxunaydı...

Kaş ki bir gün yaza biləydim öz həqiqi tarixçəmi,

məndə məni yox, Səni nişan verə biləydim, Səni...

Səlim Babullaoğlu