Evlilik təklifinə necə "yox" demək olar? - 5 üsul

“Ev­lən mənimlə” – bir çox qadın sevdiyi insandan bu sözləri eşitməyi arzulayır. Lakin bəzi xanımlar üçün evlilik təklifi xoş sürpriz olmur.

Bəzi hallarda qadınlar öz-özünə belə nəticəyə gəlir: “Bu insanı sevmirəm. Onunla xoşbəxt olmayacağam. O da mənimlə xoşbəxt olmayacaq”.

Digər situasiyalarda isə qızlar evliliyin özündən çəkinir və bunu belə izah edirlər: “Hələ tezdir, mən hazır deyiləm”.

Bəs kişi incimədən və təhqir etmədən evlilik təklifindən necə imtina etmək olar?

Loading.aZ bu barədə ətraflı məlumat verir.

Sevinc nümayiş etdirməmək

Əsas qayda odur ki, sevinirmiş kimi davranmayın. Əks halda, sonradan verilən imtina kişini ciddi şəkildə çaşdıra və ya qəzəbləndirə bilər. O, nə baş verdiyini anlamaya və bununla ona istehza edildiyini düşünə bilər.

Zarafata salmamaq

Belə ciddi məqamda zarafat etməyə çalışmaq düzgün deyil. Hazırcavablıq vəziyyəti yumşaltmayacaq, əksinə, daha da gərginləşdirəcək.

Yalan ümid verməmək

Əgər bu insanla heç vaxt evlənməyi düşünmürsünüzsə, “Hələ vaxtı deyil”, “Əvvəl ailənin maddi təminatını düşünmək lazımdır”, “Əgər sən bunu etsən, razılaşaram” kimi ifadələr işlətməyin.

Sadəcə “yox” demək

Əgər evlilik təklifini qəbul etməyəcəyinizə əminsinizsə, bunu açıq şəkildə bildirin. “Yox” demək kifayətdir. Dolayı cavablar və ümumi ifadələrə ehtiyac yoxdur. Kişi dərhal başa düşməlidir ki, təklif qəbul edilməyib. Bəli, birbaşa imtina etmək çətindir. Amma bunu etmək lazımdır.

Üzr istəmək və vəziyyəti izah etmək

Baş verənlərə görə üzgün olduğunuzu göstərmək vacibdir. Daha sonra isə niyə təklifi qəbul etmədiyinizi izah edin. Dürüst olun, amma qarşı tərəfin qürurunu incitməməyə çalışın. Heç bir halda problemin kişinin özündə olduğunu deməyin.