Talut kimdir?

Talut Bəni-İsrail qövmünün hökmdarlarından biridir. Həzrət Davud Peyğəmbərin (ə) müasiri və qaynatası olmuşdur. Bibliyada adı “Saul” şəklində verilib. Qurani-Kərimdə 2 dəfə adı çəkilir. Xarici görünüş baxımından iri cüssə­li, qüvvətli və yaraşıqlı idi. Bundan əlavə, həm imanda, həm bacarıqda, həm də igid­likdə ətrafdakılardan seçilirdi. Bəni-İsrail qövmü düşmən hücumuna məruz qalanda Allahın əmri ilə Talut onlara hökmdar təyin edildi. Talut qoşun yığıb döyüşə yollandı. Yolda ikən Allah tərəfin­dən əmr alaraq öz əsgərlərinin sədaqətini və igidliyini sınağa çəkdi, onların arasından ən layiqlilərini seçdi (bax: Bəqərə, 249). Sayı­nın azlığına baxmayaraq, Bəni-İsrail qoşunu qalib gəldi. Bu arada azyaşlı Da­vud (ə) düşmən tərəfdəki nəhəng pəhləvan Calutu öldürdü. Həzrət Davud (ə) böyüyüb Talutun qızı ilə evləndi və Talut vəfat etdikdən sonra onun yerinə keçib Bəni-İsrail qövmünün hökmdarı oldu. Bibliyada Talutun şəxsiyyəti ilə bağlı verilən bəzi məlumatlar (Davudla (ə) düşmənçilik etməsi, hətta onu öldürmək istəməsi) İslam mənbələrində öz təsdiqini tapmayıb. İslam mənbələrində Talut əda­lətli, mömin bir hökmdar kimi tanınır. Hətta bəzi müsəlman alimləri Talutun peyğəmbər olduğunu bildirmişlər.