Pis yuxu

Dərdsiz adam varmı? Bir göstər, hanı?

Üzü gülənin də qəlbi sınıqdı.

Eeh, mənim ürəyim yüz yerdən damır,

Nə bilim, bu qorxu hardan damıbdı?

Bəlkə, səndən damıb, bəlkə, özgədən. 

Üzümü qırxanda, bəlkə, güzgüdən.

İndi mən neyləyim? Özün de, özün:

Güzgünü sındırım, ya səndən küsüm? 

Mənim dərdim axı nəyinə lazım?

Gördüyüm o yuxu nəyinə lazım?

Bu sorğu-sualdan, sən Allah, əl çək!

Bir pis yuxuydu da... qarmaqarışıq... 

Nə mən dərd eləyim, nə sən fikir çək,

Elə bil heç bu gün rastlaşmamışıq.