O vaxtı

Yadındamı, bitirmişdik məktəbi,

Məhlənizə dadanmışdım o vaxtı. 

Baksovetdən gül almışdım səninçün, 

İlk pulumu qazanmışdım o vaxtı.

Yadındamı, univermağın tinində

Yükün aldım ananın da, sənin də. 

Yıxılmışdım, dəmir yolun keçəndə, 

Sizə qədər utanmışdım o vaxtı.

Yadındamı, leysan yağış yağan gün,

Elçilərin üzüyünü taxan gün? 

Yadındamı, sən ağ günə çıxan gün, 

Qaranlığa qapanmışdım o vaxtı...

Nə biləydim qəlbində var özgəsi,

Deyirdilər, dinləmirdim heç kəsi. 

Andım idi dilimdə "sən" kəlməsi, 

İmanıma inanmışdım o vaxtı.