Bilirsən mən əvvəl yağış olmuşam?

Bilirsən mən əvvəl yağış olmuşam?

Səmadan tökülüb ürəyim yerə

Sən o gün ovcunu göyə açmısan

Biraz həsrət qalıb kürəyim yerə

Torpağa çatmamış göyü atmamış

İlk mənə toxunan əllərin olub

Öpüb barmağının hər dənəsindən

Sonra da ürəyim güllərin olub

Beləcə başlayıb darıxmağımız

Güllərin qoxusu açmayıb məni

Sürünüb torpağa can atmışam ki

Gəzim yer üzünü axtarım səni

Atmışam özümü dənizə çaya

Bax belə yolunda qocalmışam mən

Əlinə bir daha toxunmaq üçün

Yenidən göylərə ucalmışam mən

               Zamiq Kövsəri.