Bu yaşda partnyor tapmaq çətindir - Psixiatrdan AÇIQLAMA

Müasir tanışlıq tətbiqləri insanlarda seçim imkanlarının sonsuz olduğu təəssüratı yaradır. Lakin yaxın münasibət qurmaq çox vaxt çətinləşir. Psixiatr Marin Kolombel bildirir ki, yetkinlik dövründə 30 və 50 yaş ətrafı münasibət qurmağa mane olan xüsusi daxili və sosial çətinliklər ortaya çıxır.

Loading.az xarici mediaya istinadən xəbər verir ki, Fransanın Ifop institutunun araşdırmasına görə, tanışlıq saytlarından istifadə edənlərin 57 faizi yazışmadan real görüşə keçə bilir. Tanış olmaq üçün imkanlar çox olsa da, dərin münasibət qurmaq yenə də asan deyil.

30 yaşlarında yaranan təzyiq

30 yaşlarında bir çox insan özünü cəmiyyətin qəbul etdiyi normadan kənarda və ya həyatın ümumi ssenarisindən geri qalmış hiss edir.

“30 yaşdan sonra ailənin təzyiqi arta və ya uşaq sahibi olmaq istəyi yarana bilər. Bu da insanı yenidən partnyor axtarışına yönəldir”, – Kolombel izah edib.

Belə təzyiq ünsiyyətdəki rahatlığı azaldır, hər görüşü isə taleyüklü sınaq kimi göstərir. Halbuki tanış olmaq texniki baxımdan mümkündür: Ifopun məlumatına əsasən, tanışlıq tətbiqlərində qeydiyyatdan keçən 30 yaşdan yuxarı qadınların 80 faizi ən azı bir görüşə gedib. Əsas maneə təkliflərin azlığı deyil, nəticə ilə bağlı həddindən artıq narahatlıqdır.

50 yaşdan sonra yeni başlanğıc

50 yaşdan sonra yaxın münasibət axtarışı çox vaxt yeni başlanğıc tələb edir. Bu dövr boşanma, həyat yoldaşının vəfatı və ya övladların evdən ayrılması kimi ciddi dəyişikliklərlə müşayiət oluna bilər.

“50 yaşdan sonra insanlar həyatdakı dəyişikliklərlə, boşanma, həyat yoldaşının vəfatı və ya uşaqların evdən ayrılması ilə üzləşirlər. Tənhalıq qorxusu, yaşlanma ilə bağlı narahatlıq və ünsiyyət imkanlarının azalması insanı cütlük münasibətində olmağa həqiqətən ehtiyac duyub-duymadığını yenidən düşünməyə vadar edə bilər”, - psixiatr qeyd edib.

Yaxınını itirənlər üçün bu proses xüsusilə çətin ola bilər. Maneə yeni insanlarla tanış olmaq imkanının azlığı deyil, yenidən münasibətə açılmağa psixoloji hazır olmamaqdır.

“Uzun illər birlikdə olduğun partnyoru itirdikdən sonra özünə gəlmək yas prosesinin çətin mərhələsidir. Vəfat etmiş həyat yoldaşını ‘əvəz etdiyini’ düşünməkdən yaranan günahkarlıq hissi yeni münasibətə açılmağa mane ola bilər”, - mütəxəssis vurğulayıb.

Fransanın Drees qurumunun statistikası da itkinin qadınlar və kişilər tərəfindən fərqli yaşandığını göstərir. Həyat yoldaşının vəfatından beş il sonra dul qalmış kişilərin yarıdan çoxu yenidən cütlük münasibətində yaşayır. Həyat yoldaşını itirmiş qadınlar arasında isə yeni münasibət quranların sayı hər beş nəfərdən biridir. Qadınların bu addımı atması daha uzun çəkir və onlar bunu psixoloji baxımdan daha ağır yaşayırlar.

Hər iki yaş dövrünü birləşdirən nədir?

Həm 30, həm də 50 yaşlarında insanlar cəmiyyətin onlara qəbul etdirməyə çalışdığı qəliblərə uyğun gəlmədiklərini düşünə bilərlər. Bununla yanaşı, romantik münasibətlərin əsasən gənclik dövrü ilə əlaqələndirilməsi də təsir göstərir.

“Media əsasən gəncliyi göstərir və 50 yaşdan sonra xoşbəxt sevgi nümunələrinə az yer ayırır”, - həkim bildirib.

Romantik münasibətlər barədə söhbətlər əsasən 35 yaşadək dövrlə məhdudlaşanda insanda fürsətin artıq əldən çıxdığına dair yanlış təəssürat yarana bilər. Bu çətinliyi aşmağın əsas yollarından biri sərt qəliblərdən uzaqlaşmaq və həyatın reallığını qəbul etməkdir.