Ailə terapevti münasibətləri məyusluğa aparan səhvi açıqladı

İnsanlar çox vaxt düşünürlər ki, sevgi bərabərlik, balans və qarşılıqlı pay bölgüsü deməkdir — hər şey “əlli-əlli” olmalıdır. Lakin reallıqda münasibətlər, eləcə də həyat özü, hər zaman ədalətli oyuna bənzəmir.

Loading.aZın məlumatına görə, "Psychology Today" üçün yazan ailə terapevti Fil Stark bildirib ki, münasibətlərdə tam ədalət gözləmək insanı məyusluğa aparır. 

Onun sözlərinə görə, mükəmməl bərabərlik mümkün deyil, çünki hər bir insan fərqlidir. 

Bəzən tərəflər narazı qalır: “Niyə həmişə yeməyi mən bişirirəm, evi mən yığıram, o isə yox?” Amma ola bilər ki, siz bu işləri daha yaxşı görürsünüz, bu proses sizə xoş gəlir və ya siz səliqəsizliyə dözə bilmirsiniz, halbuki tərəfdaşınız bundan narahat deyil.

Eləcə də maliyyə qərarlarını bir tərəfin qəbul etməsi bəzən ədalətsiz görünə bilər, lakin həmin insan bu sahədə daha təcrübəlidir və ya sadəcə maliyyə məsələlərinə maraq göstərir. Bəzən biz hətta buna görə minnətdar oluruq, çünki bu məsuliyyəti üzərimizə almaq istəmirik.

Oxşar hal ortaq istirahətin planlaşdırılmasında da müşahidə olunur. Bəzən bir tərəf “hər şeyi idarə edir”, amma bu, mütləq nəzarət cəhdi deyil — sadəcə o, daha sosial, planlı və diqqətlidir, digər tərəf isə daha rahat və aramdır.

Fil Stark vurğulayır ki, münasibətlər iki eyni yarının deyil, bir-birini tamamlayan iki pazl hissəsinin birləşməsidir. Hər kəs öz payını verir, lakin bu pay heç vaxt eyni ölçüdə və formada olmur. Ona görə də “hər şey ədalətsizdir” kimi hisslər yarandıqda, ideal balans axtarmaqdansa, fərqliliyi münasibətin təbii bir hissəsi kimi qəbul etmək daha sağlamdır.