Xəzər Süleymanlı - Ağ günə çıxdımı qara gözlərin?

Yuxumu gözümdən oğurlayan qız,
Ağ günə çıxdımı qara gözlərin?
Elə ağladım ki arxanca sənin,
Yuyuldu yollardan ayaq izlərin...

Daha tükənmişəm, daha bitmişəm,
Sənin nə vecinə rahat yatırsan...
Mən sənə haqqımı halal etmişəm,
Sən niyə yuxuma haram qatırsan?

Qayıtmaz o günlər, bilirəm indi.
Qoyardın başını, sinəmə hərdən
Gecəni ikiyə bölürəm indi,
O yanında sən yat, bu yanında mən...